قال الكابتن محمد زيدان، لاعب منتخب مصر السابق، إن منتخب السنغال خطف منتخب مصر بدري، متابعا: كنا بنلعب وإحنا خايفين من أول ما سنترنا.
وأضاف محمد زيدان، خلال برنامج كلمة أخيرة، المذاع على قناة on: فيه عبء كبير على محمد صلاح ومكناش متوقعين إنه يضيع ضربة جزاء.، ليعلق الكابتن حسني عبدربه: الغريب إنه محمد صلاح لعب ضربات الجزاء قدام السنغال في الأول.
وقالت الإعلامية لميس الحديدي: كل نجوم العالم بيضيعوا ضربات الجزاء وميسي لسة مضيع واحدة، متابعة: إحنا شعب بيحب الكورة بطبعه و100 مليون مشجع ومحلل ولاعب وأصبنا بإحباط كبير.
وقال الكابتن محمد زيدان: هقول رأيي بصراحة مكناش نستحق نصعد لكأس العالم، متابعا: مينفعش كل مرة نقول عملنا اللي علينا ومنوصلش لحاجة.
وأضاف محمد زيدان: تشكيل المنتخب كان فيه فزلكة ومتعلمناش الدرس اللي خدناه من شهر، ومينفعش قدام السنغال نلعب من غير مهاجم وزيزو غير شكل الملعب.
